පුංචි දරුවෝ දන්නෙම නැතුව ඇඟ තෙමාගන්නවා. මේක හරිම සාමාන්‍ය දෙයක්නේ. ඒ වුනාට යම් වයස් සීමාවකින් පස්සෙත් මේ විදියට නොදැනීම මුත්‍රා යනවා නම් එක රෝගී තත්වයක්.
අම්මලා මේ ගැන අවදානය යොමු කරන්න ඕනෑ වයස් සිමාව මොකක්ද? ඇයි මෙහෙම වෙන්නේ? සහ මේ සඳහා කල හැකි දේවල් මොනවාද? කියන කාරනා ගැන ඔබේ අවදානය යොමු කරන්නයි අද අපේ බලාපොරොත්තුව.
උපතේ සිට වයස අවුරුදු පහ දක්වා කාලය තුල නොදැනුවත්වම මුත්‍රා පිටවීම සාමාන්‍ය දෙයක්. මෙය දවල් කාලයේදී වගේම රාත්‍රී කාලයේදීත් සිදු විය හැකියි.
නමුත් දරුවාගේ වයස අවුරුදු දෙකක් තුනක් වන විට දවල් කාලයේදී පාලනයක් සහිතව මුත්‍රා පැහැ කරන්නට දරුවා හුරු කිරීමට වැඩිහිටි ඔබ වගබලා ගත යුතුය. මෙසේ පාලනයකට අනුව මුත්‍රා පහ කිරීම හුරු කර තිබියදීත් අසාමාන්‍ය ලෙස මුත්‍රා පහ කරනවා නම් එය යම් රෝගී තත්වයක් වීමට හැකියාව තිබේ.
කෙසේ නමුත් වයස අවුරුදු පහක් දක්වා දරුවෙක් නින්දෙන් ඇඳ තේමා ගැනීම බිය වීමට කාරණයක් නොවේ.
රෑ නින්දෙන් මුත්‍රා පිට වීම ඉතාම සුළු පිරිසකගේ එනම් 10% තරම් වන පිරිසකගේ වයස අවුරුදු දහ හතර පමණ දක්වා පැවතිය හැකියි. 1% පමණ පිරිසකගේ මෙම තත්වය වයස අවුරුදු 21 පමණ වන තෙක් පවතින්නටත් පුළුවන්. (රෝගයක් නැතිව)
නමුත් මෙය වයස සමග ගැටළු සහගත තත්වයක් වනවා වගේම සැඟවුණු රෝගයක් වීමේ හැකියාවත් වැඩි වන නිසා වෛද්‍ය උපදෙස් ගැනීම සුදුසුයි.
මෙසේ රෑ නින්දෙන් මුත්‍රා පැහැ වීමට හේතු මොනවාද?
මුත්‍රාශය පාලනය කරන ස්නායු වල ඇති යම් යම් දුර්වලතා නිසා මේ තත්වය ඇති වනවා. බොහෝ විට මෙය ඉබේම සුව වීම සිදු වනවා.
එහෙත් මෙවැනි තත්වයක් දරුවාගේ වගේම දෙමව්පියන්ගෙත් මානසික ගැටළු වලට මග සලසනවා. ඒ වගේම ලැජ්ජාව නිසා බොහෝ දෙනා මේ ගැන වෛද්‍යවරයෙකුට පවා කියන්නට මැලි වන අවස්ථා තිබෙනවා.
මේ නිසා මේ ගැන ඔබ කල යුත්තේ කුමක්දැයි දැනුවත් වීම වැදගත්.
දරුවා විසේසඥ වෛද්‍යවරයෙකුට පෙන්වා අදාළ පරීක්ෂණ සිදු කරවා ගන්න. එම පරීක්ෂණ සාමාන්‍යයි නම් දරුවාට වයස අවුරුදු පහක් දක්වා විශේෂ ප්‍රතිකාරයක් අනවශ්‍යයි.
එහෙත් පාසල් අවධියේ හෝ යොවුන් වියේදී රෝගයක් නැතිවත් මුත්‍රා පිට වීම සිදු වීම සාමාජයීය ගැටළු රැසකට මුල. මේ නිසා ප්‍රතිකාර අවශ්‍යයි.
මේ සඳහා වෛද්‍ය නිර්දේශයට අනුව ලබා දෙන්නට නියමිත ප්‍රතිකාර නිසි ආකාරයෙන් ලබා දීම වැදගත් වන අතර ගොඩ වෙදකම් කරන්න යන්න එපා.
ඒ වගේම මෙය දරුවාට මානසික ගැටළුවක් වන්නට ඉඩ නොදීම පවුලේ සාමාජිකයින්ගේ වගකීමක්.
මෙහිදී ඔබේ අවදානය යොමු කල යුතු තවත් කාරණයක් තිබෙනවා. ඒ තමයි මෙසේ රෑ නින්දෙන් මුත්‍රා පිට වීම සිදු වූ දරුවෙකු එක වරම සුව වී නැවත කාලයකට පසු එම තත්වය ඇති වීමේ හැකියාවක් තිබීම.
එවිට කල යුත්තේ කුමක්ද?
මේ තත්වයට හේතුව මුත්‍රාශයේ යම් ආසාදන තත්වයක් විය හැකියි. ඒ නිසා යලි මතු වූ මුත්‍රා පිට වීමේ තත්වයකදී අනිවාර්යෙන්ම වෛද්‍ය ප්‍රතිකාර ලබා ගන්නට ඕනෑ. ඒ වගේම කලින් තිබු තත්වයන් ගැන වෛද්‍යවරයා දැනුවත් කරන්නටත් ඕනෑ.
කෙසේ වෙතත් ඉබේ මුත්‍රා පිට වීමේ ගැටලුව නිසා පාසල් වියේ දරුවන් විශාල වශයෙන් මානසික අසහනයට ලක් වී තිබෙනවා. ඒවාට නිසි ප්‍රතිකාර නිසි වයසේදී නොකිරීම හේතුවෙන් සුව කල හැකි තත්ත්ව මග හරි දරුණු ආසාදන තත්ත්ව වලට ගොදුරු වන අවස්ථාද තිබෙනවා.
මේ නිසා මේ ගැන ඔබේ අවදානය යොමු කිරීම වැදගත් බව සිහි තබා ගැනීම වටිනවා.
Subscribe to:
Post Comments (Atom)
0 comments:
Post a Comment